Anseye Pou Ayiti ap envesti nan yon sistèm edikatif ayisyen ki bay tout sitwayen dwa ak bon jan kalite edikasyon. Nan Anseye Pou Ayiti, nou travay ak kominote yo pou n kreye yon rezo lidè sivik. Ansanm, n ap konstui yon sistèm edikasyon egalego ki chita sou istwa, valè, epi vizyon.
Inisyativ sa a se youn nan priyorite nan « faz 2 » mouvman Anseye Pou Ayiti. Nou vle anplifye youn nan zouti—kotchin—ki akselere enpak APA depi premye kowòt anseyan-lidè nou yo (depi 2015). Nou vle devlope yon rezo kotch pou pèmèt plis aprenan, anseyan ak kominote, sitou nan zòn pwovens yo, devlope plis konpetans toujou. Finalman, nou vle enfliyanse yon chanjman nan sistèm nasyonal la—pou wòl kotch lan vin yon aktè esansyèl nan ledikasyon. Aprè seri devlopman pwofesyonèl sa yo, kotch yo ap kapab rive travay nan òganizasyon, biznis, lopital e lòt sektè, paske se kotch yo k ap motè chanjman pou n devlope lidè atravè sosyete nou. Se poutèt sa kourikouloum nan konstwi pou devlope konpetans transvèsal lakay kotch yo.
Pou kòmanse, kotch sa yo pra l travay nan lekòl patnè APA yo sou depatman Plato Santral ak Latibonit. Pwogram fòmasyon an ap dire yon total 4 lane. Kotch la ap resevwa fòmasyon an liy e an pèsonn pandan premye ane a, epi pral travay a tan plen nan lekòl yo plase l la pandan lòt 3 ane yo, tout pandan li kontinye ap resevwa fòmasyon (Yon kotch = yon lekòl). Apre peryòd sa a, kotch yo pral lib pou travay ak lòt sektè.
Ansanm nou kapab avanse pi byen. Jan pwovèb la di l «yon sèl dwèt pa manje kalalou » oubyen « men anpil, chay pa lou ». Menmsi genyen yon konplèks endividyalite ki egziste, sa pa anpeche n soude e kolabore ansanm. Solidarite sa a parèt klè lè nou fè patenarya ak lekòl ki deja egziste, ak lòt enstitisyon ki ap fè menm travay sa a oubyen ki kwè nan yon lòt edikasyon pou yon chanjman reyèl. Solidarite n ap pwone a pran fòm nan aksyon nou.
Ekselans la defini nan kalite travay nou, nan fason nou chak ap fè pou reponn ak responsabilite yo. Kèlkeswa sa n ap fè, nou dwe fè pwèv ekselans, nan travay, nan sal klas, nan patisipasyon nan lavi kominote a, e latriye. Nou vle fè tout sa n ap fè nan pi wo nivo konpetans nou. APA vize pi wo nivo ekselans nan fason aprenan yo ap devlope konpetans nan plas repete pa kè. Chak aprenan dwe jwenn sipò yo merite, selon bezwen yo.
Li esansyèl pou nou youn respekte lòt, soti nan konfesyon fwa yo, pratik yo, filozofi lavi yo, abitid yo e latriye. Respè ede sosyete a byen mache. Avèk respè, echanj youn ak lòt vin pi fasil. Nan APA respè koutim chak zòn enpòtan. APA toujou mansyone 3 K yo: Kilti, Koutim ak Kominote ki se 3 pilye enpòtan ki entegre travay nou. Respè pou APA rantre nan tout ti detay.
Jeneralman, yon angajman mande reflechi anpil anvan w pran l. Angajman avèk APA gen 2 nivo. Yon premye nivo ki relatif ak kontra kotch la siyen an, yon dezyèm ki pa siyen men ki gen anpil enpòtans – ki se angajman pou sipòte koz ledikasyon an Ayiti. APA pa gen pretansyon l ka chanje peyi a pou kont li, men l kwè si nou tout mete ansanm, n ap kapab. APA kwè angajman siyifi responsabilite.
Enstiti a ap ekipe kotch yo pou yo vin motè ak katalizè devlopman an nan lekòl yo epi nan kominote yo. Kotch yo pral jwe yon wòl relasyonèl ak aktè nan kominote yo epi tout lòt resouzimèn posib.
Pou rekrite nan pwogram sa a, postilan an bezwen:
Diplòm nan Syans Edikasyon oubyen Lekòl Nòmal.
Minimòm 3 ane eksperyans nan ansèyman, administrasyon eskolè, oswa enspeksyon eskolè.
Minimòm 2 ane eksperyans nan andragoji, espesyalman nan ankadre oswa sipèvize lòt pwofesyonèl.
Eksperyans pedagojik solid, espesyalman nan fasilitasyon seyans devlopman pwofesyonèl.
Kapasite pou bay fidbak pou ranfòse kapasite lòt pwofesyonèl.
Demontre yon wo nivo lidèchip.
Demontre yon bon sans inovasyon ak kreyativite.
Demontre yon nivo otonomi ak disiplin pèsonèl ki wo.
Kwayans solid nan misyon, vizyon, valè ak modèl edikasyon APA a.
Eksperyans avanse nan Teknoloji Enfòmasyon ak Kominikasyon (posede yon òdinatè pèsonèl, yon telefòn entèlijan) ak bonjan kapasite pou itilize zouti dijital.
Ekselan kapasite kominikasyon oral ak ekri (Kreyòl ak Fransè).
Ap viv nan Depatman Sant, oswa montre volonte pou rezide nan zòn Plato Santral pandan tout dire pwogram nan (4 lane). Nòt: APA pa responsab pou deplasman ak lojman.
Bon jan kapasite nan planifikasyon ak òganizasyon.
Fòmasyon sa a trè pratik. Li ap fè yon mizajou sou konesans patisipan yo te genyen deja nan domèn pedagoji ak andragoji epi l ap ajoute eleman ki relatif ak kotchin epi lidèchip.
Finalite a se rive genyen yon rezo kotch ki metrize kesyon ansèyman aprantisaj byen, epi ki kapab ankadre kominote lekòl la pou kondwi li nan yon apwòch transfòmasyonèl ki pra l rann lekòl la pi enklizif e wè tèt li kòm kominote kote chanjman an kòmanse. Kotch sa yo tou ap resevwa fòmasyon ki ap pèmèt yo travay ak diferan lòt sektè.
Fòmasyon sa a kouvri anviwon 5 modil sa yo:
Prensip bazik kotchin
Teknik kotchin
Teknik andragojik
Relasyon lekòl ak kominote
Kilti nimerik
Jan li mansyone pi wo a, wòl kotch la esansyèl nan kad pwogram sa a. Sa ki site nan dokiman sa a pa final, li pa bay tout wòl kotch la. Men an gwo, kotch la pral:
Akonpaye ekip pedagojik, administratif ak estaf anseyan lekòl la pou amelyore rezilta aprenan yo (obsève anseyan, bay fidbak konstriktif, epi devlope plan devlopman pèsonèl pou yo).
Kreye oswa ranfòse relasyon ant lekòl la, paran ak kominote a.
Akonpaye direksyon an nan desizyon pedagojik, administratif ak lòt aspè jesyon lekòl la.
Sèvi kòm ajan chanjman nan kominote a pou ranfòse enpak edikasyon.
Travay nan tèt kole ak komite paran lekòl la epi tout lòt pèsonèl pou kreye yon klima aprantisaj efikas ak transfòmasyonèl.
Analize rezilta yo pou ede pran desizyon ki baze sou done.
Ankouraje epi favorize aplikasyon nouvo metòd ansèyman ak itilizasyon zouti pedagogik.
Ede òganize ak fasilite atelye fòmasyon, vityèl oswa prezansyèl, pou kowòt anseyan yo.
Ankouraje ak devlope lidèchip nan mitan kominote edikatif yo.
Suiv pwogrè anseyan yo atravè evalyasyon regilye.
Elabore rapò sou enpak travay la, pèfòmans anseyan yo ak rezilta aprantisaj aprenan yo.
Ede lekòl la mete sou pye oubyen ranfòse komite lekòl la.
Apwòch APA pa priyorize konstriksyon lekòl. Sa pa vle di l pa enpòtan, men l vle priyorize kalite a anvan kantite a. Pou rezon sa a, se toujou patenarya APA ap devlope ak lekòl ki egziste deja pou pwogram sa a. Lekòl ki pra l kolabore ak pwogram nan pra l:
Reponn ak kèk egzijans/kondisyon,
Siyen yon pwotokòl akò.
Aksepte kreyòl kòm lang ansèyman nan lekòl la (sa pa vle di elimine franse);
Dakò elimine chatiman kòporèl (bat aprenan yo);
Ofri estaf li salè minimòm APA egzije;
Genyen yon pwofesè minimòm pa klas;
Genyen yon direktè pedagojik;
Montre yon nivo rigè/disiplin ak responsabilite;
Aksepte filozofi APA an jeneral.
Seyans Devlopman Pwofesyonèl pou estaf anseyan yo;
Kotchin pou anseyan yo;
Kotchin pou administrasyon an (direksyon an);
Enplikasyon nan lavi lekòl la ak komite paran yo.
